शहरा लेबल असलेली पोस्ट दाखवित आहे. सर्व पोस्ट्‍स दर्शवा
शहरा लेबल असलेली पोस्ट दाखवित आहे. सर्व पोस्ट्‍स दर्शवा

शहरा

तुझ्या जमिनीवर पाय ठेवल्याबरोबर
माझी नजर अडकते
सिनेमांच्या पोस्टरवरील
नट्यांच्या उत्तान स्तनांवर.

नंतर मी जेव्हा हिंडून घेतो
झगमगीत बाजारपेठेतून
विंडोशॉपिंग करीत
तेव्हा क्रीम आणि सेंटच्या तीव्र सुगंधामागे
घसटत जाते माझी वासना कितीतरी दूर.

मला सतत वाटते भीती
कुणीतरी कापेल माझा खिसा
म्हणून टेलरकडून तो
मुद्दाम बनियनच्या आतून शिवून घेतलाय.

मला वाटते नेहमी धास्ती
गल्लीबोळातून शॉर्टकट घेताना
कुणीही लावेल चाकू
म्हणून मी पक्क्या सडकेनेच फिरतो;
तर मला पाळता येत नाहीत
तुझ्या रहदारीचे नियम संपूर्णपणे.

म्हणून काय-
रिक्षावाल्याने मला आईवर शिवी द्यावी,
सायकलवाल्याने धक्का मारावा,
स्कुटरवाल्याने खाऊ की गिळू पहावे,
कारवाल्याने अंगाला चाटून जावे,
आणि ट्रकवाल्याने चिरडावे
किड्या-मुंगीसारखे.